Bera Bera - Berriak

21 Iraila 2012

Bera Bera Eskubaloia gaur arratsaldean iritsi da Viborgera, Champions Leaguen debuta egingo duen Danimarkako hiria. Euriz jaso ditu donostarrak, bihar arratsaldeko 4etan Poloniako txapeldun Vistal Lazcpol Gdynia taldea aurrez aurre izango dutenak.

Madrilen lo egin ostean, taldeak Danimarkara abiatu da goizean hegazkinez. Viborgek Europako lehiaketa gorenean jarraitzeko kanporaketa antolatu du, non lau taldeek Champions Leagueko multzoen fasea jokatzeko aukera emango lukeen txartel bakarra dute jokoan.

Bera Berak bihar 10,15etan egingo du entrenaldia arratsaldean jokatuko den pistan. Taldeak 11,45etan bazkalduko du eta ondoren atsedena hartu. Donostiarrek debuta egingo dute lehiaketa honetan Poloniako Vistal Laczpol Gdynia arratsaldeko 4etan.

Ezker aldea zaindu

Bera Berak bezala, Poloniako txapeldunak ligako aurreneko hiru partidak irabazi ditu. Reyes Carrere entrenatzailearen esanetan “gu baino haundiagoak dira eta gol asko sartu ditu ligan”. Zentzu honetan azpimarratu du “ezker aldea, Marina Mateescu laterala eta Karolina Sulzycka hegalekoa egiten duten jokoa”. “Erasoa Patrycja Kulwinska pibotearekin borobiltzen dute” dio Bera Berako entrenatzaileak. Horrez gain, ezin ahaztu behar Bera Berako jokalari ohiak Natasa Krnic eta Ana Petrinja.

Bestetik, Bera Bera Viborgera plantilla osoarekin iritsi da, pasa den asteartean Kukullagaren aurka jaso zuen kolpea ahazu du Alba Menendezek. Viborg HK – LC Brühl partidak irekiko du kanporaketa eguardiko 1etan. Ondoren, Bera Berak –etxean legoke- Vistal izango du aurrean 16etan. Irabaziz gero Bera Berak finala igandean 16,50etan jokatuko luke eta ETB K SATek zuzenean eskainiko luke partida.

20 Iraila 2012

Bera Bera Eskubaloioak gaur arratsaldea irtengo da autobusez Madrilera eta bihar goizean hegazkinez Danimarkara egingo du bidaia. Champions Leaguen egingo du debuta Bera Berak larunbatean. Superkopa eskuratzea nolabait, iazko denboraldiari amaiera bikaina jartzea suposatu badu ere, Champions League bezalako lehiaketan parte hartzea lorpen handia da Bera Bera Eskubaloiarentzat. Emakumeen eskubaloiko ohorez mailan 23 denboraldi igaro dira Europa mailako lehiaketa gorenean debuta egin ahal izateko eta hiru aldiz Championsa irabazi zuen Viborgen pistan gauzatuko da. Bera Berak lehiaketan jarraitzea du jokoan asteburu honetan, Itxakok muzin egin zion Champions jokatzeari eta, ondorioz, Bera Bera da Espainiako ligako ordezkari bakarra. Horrela, bihar arratsaldean iritsiko da Viborgera, larunbat goizean saio arin bat beteko du 10,15etan pistan bertan eta 16etan Poloniako txapeldun Vistal Laczpol Gdynia izango du aurrez aurre, Austriako Radojko Brkic eta Andrei Jusufhodzic epaileak zuzenduko duten partidan. Aurretik, 13etan Viborg eta Brühl finalean leku baten bila arituko dira. Igandean, hirugarren eta laugarren postua jokoan jarriko da 14etan eta ondoren finala. Bera Berak Poloniako txapelduna gainditzen badu ETB K emango luke finala 16,50etan. Helburua lortuz gero, Donostiak Champions Leagueko hiru partida jasoko ditu eta horien artean egungo txapelduna Buducnost. Partidaren bat galduz gero, Bera Bera Errekopara pasatuko litzateke.

18 Iraila 2012

Bera Bera Eskubaloiak hirugarren garaipena eskuratu du Kukullaga Etxebarri (30-18) gainditu ostean datorren asteburuan Danimarkan Champions League dela eta hirugarren jardunaldiari dagokion partida. Reyes Carrerek jokalari guztiei aukera eman die Darly Zoqbi atezaina izan ezik, 120 ligan minutu guztiak jokatu zituena orain arte. Horrela, Yamiley Rodríguez kanariarrari ardura eman dio eta gazteak berriro ere erantzun egin du eta hortaz gain, erasoan Nagore Arizagari eman dio gidaritza, aurtengo ligan debuta eginez. Andoaindarraren ondoan Vero Cuña eta Alba Menéndez. Lehenengo zatian Eli Pinedo eta Eider Rubio eserlekuan egon dira. Patricia Elorza atera da Alba Menendezek min hartu duenean. Partidak gora behera handiak izan ditu. 0-2 aurreratu dira bizkaitarrek baina Bera Berak kontraerasoak baliatuz segituan eman dio vuelta (6-2). Maria Núñez eta Silvia Ederra erdian, 6-0 defentsa, Kukullagak ezin zuen erditik sartu eta baloi ugari galdu ditu. Bigarren zatian, Eli Pinedo -20 mintuetan 4 gol- Castro eta minutu batzuetan Eider Rubio atera dira. Larunbatean bezala, Bera Berak hiru gol jaso ditu azkeneneko 15 minutuetan. Bera Bera 30 (15+9): Yamiley, Altuna (3), Ederra, Núñez (5), Menéndez (3), Cuña (2) eta Ziarsolo (5) –titular- Arizaga (1), Elorza (1), Dunay (2), Pinedo (4), Castro (4) eta Rubio. Kukullaga Etxebarri 18 (9+9) Zorrilla, María (3), Bayón (1), Elizegi (2), Nogales (4), Azkona (4) eta Azaola –titularra- Rodríguez (1), Etxabe (1), Sánchez (1), Olga (1) eta Fernández. Epaileak: Amaia Barrena eta Mónica García (Euskadi) Kanporatuak: Pinedo, Arizaga, Dunay eta Castro Bera Beratik eta María, Etxabe, Nogales eta Fernández Kukullagatik. Partzialak: 2-2, 6-2, 10-4, 11-6, 14-8, 15-9 –atsedenaldia- 17-10, 19-13, 20-15,25-15,28-16 eta 30-18.

17 Iraila 2012

Datorren asteburuan Viborgen (Danimarka) biziko dena oso polita badaere, Bera Beraren debuta Champions Leaguen izango baita, bihar Bidebietara (19,30etan) Kukullaga Etxebarri agertuko da, emakumeen eskubaloiko ohorezko mailako hirugarren jardunaldiari dagokion partida, alegia.

Pasa den larunbatean Itxakori (31-21) irabazi ostean iritsi da norgehiagoka. Nafarren aurka ez zuen ondo jokatu Bera Berak, ondorioz, Reyes Carrere entrenatzailearen jokalariek bihar izango dute beste aukera bat entrenaldietan hainbeste aldiz entsaiatzen dutena ezartzeko. Kukullaga izango da aurrean, Castron irabazi eta pasa den larunbatean Etxebarrin Porriñorekin galdu zutenak.

Pasa den jardunaldian emaitza zabalak eman ziren, ondorioz, Bera Bera egun hirugarren postuan dago hiru gol direla kausa. Elchek eta Alcobendasek aise gainditu zituzten Zuazo eta Castelldefels eta bigarren garaipena eskuratu zuten BM Rocasa eta Valenciak, Mar Alicante eta Cleba León taldeei irabazita.

Champions League

Danimarkan Bera Berak Poloniako txapeldun Vistal Laczpol Gdynia taldearen aurka jokatuko du bigarren finalerdia larunbatean (16etan) eta espero da finalean egotea, antza, bertako Viborg HK taldearen aurrean, igandean (16,50etan). Irabazleak bakarrik Champions Leagueko multzoen fasera pasatuko da non, besteak beste, Buducnost egungo Europako txalpeldunarekin topo egingo duen.

15 Iraila 2012

Bera Bera Eskubaloiak gaur arratsaldean Bidebietan ligako bigarren garaipena eskuratu du (31-21) Itxakoren aurrean joku traketsa egin arren. Superkopan aise menperatu zuen arerioa ia zortzi urte eta gero gainditzea lortu dute donostiarrek. Bera Bera oso fin hasi zen erasoan. Ia jaurtiketa guztiak golak ziren aurreneko minutuetan eta horrela markagailuak 4-1 eta 5-2 adierazten zuen. Hortik aurrera Bera Bera lasaitu omen da. Itxako, Jimenezen bitartez eta, ondore, Vero do Carnorekin gerturatu ziren 9-7. Reyes Carrerek defentsa aldatu zuen. Eider Rubio eta beranduago Eli Pinedo aurrean jarri zituen. Bera Bera intentsitatez aritu zen defentsan baina erasoan baloiak galdu zituen. Horrela, atsedenaldian 14-10. Bigarren zatian, partida ez da gehiegi aldatu. Bi taldeen akatsen erruz markagailuan aldea ez da zabaldu. Itxakok lau goletara jarraitzen zuen 44. minutuan, halere Ederra eta Pinedoren golei esker partida bertan erabakita gelditu da. Hortik aurrera, Itxakok hiru gol besterik ez ditu lortu. Bera Bera 6-0 defentsara itzuli da eta partida itzali egin da. Lehenengo jardunaldian gol batek lidergoa eman zion Bera Berari, gaur Alcobendasek eta Elchek aurrera hartu diete donostiarrei. Asteartean hurrengo partida. Bera Berak Kukullaga hartuko du 19,30etan, irailaren 22 eta 23an Champions Leagueri ekingo dio eta. Bera Bera 31, Itxako 21 Bera Bera 31 (14+17): Zoqbi, Altuna (2), Rubio (5, 2p), Dunay (1), Ederra (5), Elorza (3) y Ziarsolo (2) –titularra- Pinedo (5), Menéndez (1), Cuña (5, 1p), Castro (1) eta Núñez (1). Asfi Itxako Navarra 21 (10+11): Serrano, Badea (2), Alina (4), Sifuenes (1), Barrios (4), Vera do Carno (5), Lidia Jiménez (4, 1p) –titularra- Arrechea, Saray Urdiain, Maestro (p.s.) Tornero eta Flores (1). Epaileak: Efén Muñoz eta Julio Posada (Madrid) Kanporatuak: Castro, Menédez, Cuña eta Ederra Bera Beratik, Alina, Barrios, Do Carno eta Badea Itxakotik. Partzialak: 4-1,6-3, 8-5, 10-7, 12-8,14-10 –atsedenaldia- 18-13, 21-16, 24-18, 27-20, 29-21 eta 31-21.