Bera Bera - Berriak

30 Ekaina 2016

Bihar, uztailak 1, Espainiako B selekzio deiturikoak, Antequeran ospatzen ari den Unibertsitate mailako Mundialeko finalerdiak jokatuko ditu, multzoen fasean bigarrena gelditu delako, Japon ozta ozta eta India aise gaindituta eta Errumaniarekin gol bakar batez irabazita. Aurrean Polonia izango du eta Errumania eta Errusiak jokatuko dute beste finalerdia.
Hortaz, Sandoval eta Prades entrenatzaileek zuzentzen duten taldeak bihar 12,15etan Antequerako CTAn jokatuko dute hemen ikusgai izango den partidan. Uztailaren 2an izango da finala (14etan, Eurosport), brontzea lortzeko borroka 11,45etan izango delarik.
Bera Berak lau jokalari ditu, protagonismo askorekin gainera, bertan baitira Arrojeria, Menéndez, Zugarrondo eta datorren urtean Bidebietan izango den Leire Aramendia nafarra.
Junior Mundiala
Bestetik, Sagrario Santanak zuzentzen duen junior mailako selekzioak bihar Moskura egingo du bidaia mailako Mundiala jokatze aldera, Errusiako kapitalean burutuko dena uztailaren 3tik aurrera.
Deialdian dira Maitane Etxeberria, Eider Lizarbe eta Ane Encina legazpiarra, Ermuko Errotabarri taldekidea eta Bera Berako ohorezko mailako taldearekin astean behin entrenatzen dena (argazkian, gorriz jantzita).
Espainiak Argentinaren aurka egingo du debuta CSKA palace ikusgarrian uztailaren 3an (20etan, bertako ordutegian), hilaren 4ean Egipto izango da aurkari (20etan), asteazkenean (12etan) Alemania, hilaren 7an (18etan) Errumania eta multzoen fasea Kazajistánen aurka amaituko du hilaren 9ean (12etan).

29 Ekaina 2016

Aurreneko aldiz elkarrekin antolatuko dira emakumezkoen eta gizonezkoen eskubaloiko Superkopak eta Anaitasuna kiroldegiak, Iruñako Katedralak, alegia, hartuko ditu partidak irailaren 3 edo 4ean. Gizonezkoetan – XXXI. edizioa- eta emakumezkoetan – XVII. edizioa- Kopako finalak errepikatuko dira, hortaz, Bera Berak Prosetecnisa Zuazo Barakaldo izango du aurrean eta, bestetik, Helvetia Anaitasunak Barcelona. Ordutegiak eta datak telebistazko programazioaren arabera ezarriko dira. Kopan bezala, kadete mailako taldeek ere Superkopa jokatzeko aukera izango dute. Bera Berarentzat bosgarren Superkopa jarraian izango da, gainera lau garaipenak lortu ditu bata bestearen atzetik: 2012an Bidebietan Itxako gaindituz eta Rocasari hiru aldiz, 2014ean Guadalajaran eta birritan Gascan, 2013ean eta 2015ean. Loterías Liga eta Asobal Ligari hasiera ofiziala emateko prestatuko den gala burutuko da bezperan.

29 Ekaina 2016

Bera Bera Eskubaloiak Hypo Niederösterreich Austriako talde historikoaren aurka irekiko du Txapeldunen ligako sailkatze fasean eta emaitzaren arabera hurrengo egunean Leipzig taldea alemaniarra edo Bielorrusiako HC Gomel izango ditu aurrean. Lauko finalaren formatoan izango den atarikoa irailaren 10 eta 11n burutuko da eta EHFk aurretik zehaztu zuenez alemaniarrek izango dute lehentasuna berau antolatzeko eta Vienan zozketan Bera Berako ordezkari Matxalen Ziarsolori onartzeko prest direla adierazi diote. Oraingoan ere ez du zorterik izan Bera Berak Europako zozketan. Indarra galdu arren, Hypo Niederösterreich eskarmentu handia du Europan, izan ere Txapeldunen liga lau aldiz irabazi du (beste lau Europako kopa) eta behin Cup Winners’ Cup. Austriarrak eta gipuzkoarrak ia urtero Europan izan arren, aurreneko partida jokatuko dute Bera Bera eta Hypok elkarren aurka. Brasilekin zuten hitzarmena amaitu zuten austriarrek, iazko Txapeldunen ligan ez zuten punturik urratzeko aukerarik izan eta Cup Winners’ Cupen Danimarkako Team Tvis Holstebro taldearen aurrean amore eman behar izan zuen final-zortzirenetan. 2016-17 denboraldiko Txapeldunen Ligako multzoen fasean egoan ahal izateko, Bera Berak Hypo gainditzeaz gain HC Leipzig edo Bielorrusiako txapeldun HC Gomen izango du aurrean. Alemaniarrak dira faboritoak, are gehiago etxean jokatzen badute eta horrez gain atarikoetan eskarmentu handia dute, izan ere, azkeneko biak bereganatu baititu, Hungariko FTCri batean. Leipzig hirugarren gelditu zen ligan, bigarrena eta laugarrenarekin puntuz berdinduta. Iazko EHFn Alemaniako Metzinger taldearen aurka galdu zuen final-laurdenetan. Bestetik, HC Gomel taldeak debuta egingo du Txapeldunen Ligan eta 2013-14 denboraldian Rocasak kanporatu zuen EHFtik. Txapeldunen ligako multzoen fasera pasatzea lortzen ez duten taldeak EHF Cupen arituko dira, aurten Cup Winners’ Cup lehiaketarekin bat egin duena.

28 Ekaina 2016

Ekaineko egun hauetan zehar Bera Bera Eskubaloiak antolaturiko Kanpusean elkartu dira bi taldeak. 9 eta 13 urte bitarteko 30 gazte dira elkartu dira bertan. Eskubaloi pixka bat eta joku eta gozamen ugari lau orduetan zehar Bidebietako kiroldegiaren inguruan. Izan ere, gaurko egun eguzkitsuak urez beterik globon borrokarako aukera eman diete eta bikain pasatu dute neska-mutilek. Ekainaren 30era arte, gozatzen jarraituko dute.

27 Ekaina 2016

Txapeldunen Ligako multzoen osaketaren berri eman du gaur EHFk, aste honetan burutuko dituen bi zozketei begira. Batean, asteazkenean Vienan duen egoitzean (13etan) Txapeldunen ligako multzoen faserako sailkatzen saiatuko den Bera Bera eta uztailaren 1ean Danimarkako Glostrup hirian ligaxka osatuko dena.
EHFk egindako banaketaren arabera, Italiako eta Holandako txapeldunekin batera dago Bera Bera, hortaz, Indeco Conversano eta Sercodak Dalfsen ez ditu aurkari izango zozketan. Matxalen Ziarsolo kapitai ohia izango da Vienan asteazkenean.
Hiru azpitxapeldunek osatu dute aurreneko multzoa: Glassverket IF norvegiarrak, HC Leipzig alemaniarra eta Esloveniako Krim. Gainera beraiek izango dute lehentasuna atarikoa antolatzen.
Bigarren multzoan aurkari aurriskutsuak ditu Bera Berak, Kroaziako Podravka, Poloniako MKS Selgros Lublin edo Austriako Hypo, gainera gipuzkoarrek aurreneko partidan horietako bat izango dute aurrean.
Laugarren multzoko HC Gomel (Bielorrusia), Iuventa Michalovce (Eslovakia) edo Ankara Yenimahalle BSK (Turkia) batek osatuko du atarikoa.
Aukeratzeko betarik izanda, Bera Berak Leipzig eta Podravka saihestuko lituzte, eskarmentu handiko taldeak direlako eta atarikoetan asmatu dutenak, alemaniarrek azkeneko bietan eta kroaziarrek 2014-15 denboraldian.