Bera Bera - Berriak

06 Apirila 2016

Rocasa eta Bera Berak gaur 20,30etatik aurrera (Donostiako ordutegian, Federazioko web orrialdean streaming) aurtengo denboraldiko Loterías Ligako aukerak jokoan jarriko dituzte.
Bi taldeen artean bi puntu besterik ez daude, lehenengo itzulian kanariarrek Bidebietan irabazi zuten partidari dagokionak. Data hortatik hona, Bera Berak nahiz Rocasak garaipenak poltsikoratu dituzte bata bestearen atzetik A Guardan izan ezik, izan ere, biek amore eman baitzuten Mecalia Atlético Guardésen aurrean.
Hortaz, gaur iluntzeko partida Teldeko Antonio Morenon (Ignacio García eta Andreu Marín, Catalunya) erabakiorra izango da.
Bera Berako entrenatzaile Montse Puchek adierazi du urriaren amaieran “begiak itxita sinatuko nukeen norgehiagoka honen aurrean egotea, Liga berriz eskuratzeko aukeran jartzan gaituena” izan ere, “beraiek Bidebietan irabazi zuten bezala, guk ere Telden gauza bera egin dezakegu”. Egoera ezberdinak izan arren, partida aintzidariak Bera Beraren alde daude, iaz Telden lortu zuen matematikoki hirugarren Liga eta beste garaipen garrantzitsuak ere eskuratu zituzten gipuzkoarrek bertan.
Kanariarrak abantaila izan arren, Rocasak oraindik ligarik eskuratu ez duenez, Puchek dio “bi taldeek presio bera dugu, beraiek ere badakite Liga partida honetatik pasatuko dela”. Izan ere, eskarmentu handiko pertsona izanik, Puchek azpimarratu du “presioa hobeto kudeatzen duen taldeak partida aurrera aterako du”.
Bera Berako entrenatzaileak adierazi du Telden Rocasa gainditzeko “jokuaren arlo guztiak menperatu behar ditugu”. “Hau da dena ondo egin behar dugu –azaldu du Puchek- ondo defendatu, segurtasunez baloia igo, akats gutxi egin, eraso posizionalean gauzak garbi izan, defentsara ondo itzuli, atezainen papera ere erabakiorra izango da eta, batez ere, talde bat izan, guztiak bat eginda irabazteko gaitasuna dugula sinistuta eta egoera horretan gaudela uste dut”.
“Esperientzia” izan arren, Puchek uste du “Kanarietan jokatzea oso zaila da, bidaia, eguraldia, pista, oso ondo planifikatu behar dira gauzak dena ondo irteteko”. Horregatik, “intentsitate handiko partida” nahi du, “arriskuak” neurtuz “abiadura gustoko dugulako eta beraiek erritmo motelagoa”. “Akatsak murrizten ari gara baina espero dezagun partidako erritmoa guk finkatzea, partidaren gakoa hor egongo baita”.
Puchek amaitu du esanez gaur arratsaldean “bi puntu jartzen dira jokoan, Rocasarekiko tartea murrizteko aukera emango digutenak eta, akaso, lidergoa sailkapenean baina, hori balitz oraindik sei final geratuko lirateke”.
Partida Groseko Padock tabernan jarraitu daiteke.

05 Apirila 2016

Ligako hiru tituluak dituzten plantillako lau jokalarien artean da Silvia Ederra eta horrez gain, eskarmentu handikoa. Bestetik, 22 urte dituela, Esther Arrojeriak bi urte baino gehiago erasoko jokoan taldeko ardura hartu zuelarik. Azken urte hauetan, Rocasa eta Bera Bera taldeen artean makina bat partida jokatu arren, Silvia Ederrak uste du “partida bakoitza ezberdina da”. Bere ustez, “aurtengo parekotasun handia dugu, Ligak ere bai. Gogor landu beharko dugu partida, defendatu eta korrika egin” Telden puntu erabakiorrak poltsikoratze aldera (20,30etan Ignacio García eta Andreu Marín, Catalunya). Rocasak bi puntuko aldera ateratzen dio Bera Berari, hortaz, garaipena ezinbestekoa da donostiarrentzat. Halere, pibote nafarrak onartu du urriaren amaieran “horrela egotea sinatu genukeela”. Rocasa eta Guardes taldeen aurkako partidak galduta, Bera Bera laugarren kokatu zen sailkapen nagusian baina, orain nahiz eta Antonio Moreno pistan irabazi behar, Bera Beraren eskuetan dago. “Partida guztiak finalak balira bezala hartu ditugu Rocasak noiz galduko zain –A Guardan galdu zuen- Eta hemen gaude”. Ederrak onartu du “bi taldeen artean errespetu handia dago, partidak horregatik dira hain paretsu”. Izan ere, azken hiru norgehiagoketan gol bakar batez erabaki da lehia. Rocasa Europako Challengeko finalerdietan dago baina Ederraren ustez ez du eraginik izango. “Ligan baino maila hobea ematen ari da, lehiaketak hori ematen dizu partida gehiago izanda”. Hortaz, bere ustez gakoa “defentsa sutsua, erritmo altua ezartzea partidari eta kontraerasoa”. “Fisikoki ondo gaude, norgehiagoka bere esparrura eramaten duen taldeak asko irabazi izango du” eta azkenik dio “pista beteta ikusteak motibazioa handitzen da”. Arrojeria: “Ez dut Rocasa nekatuta espero bihar” Bera Beran eraso zuzendaria da Esther Arrojeria. Bere ustez “denboraldi hasieran ez ginen hain faborito garbiak oso jokalari garrantzitsuak galdu genituelako baina frogatu da oso defentsa ona egiten ari garela, jokalari berriak moldatu direla eta sasoi betean iritsi gara”. Esther Arrojeriak onartu du taldea apirila noiz iritsiko irrikan zegoela. “Hemen dago, gure esku dago eta guztia emango dugu Kanarietan”. “Ilusio handiz helduko diogu apirilaren aurrean oso erronka politak ditugulako”. Bere ustez “oso partida gogorra izango da. Bi talde ezberdinak gara, guri abiadura eta intentsitea komeni zaigu eta beraiei partida moteltzea. Bidebietan lortu zuten eta hori egongo da gakoa” adierazi du. Usurbilgo zentralak jakin badaki garaipena baino ez duela balio, halere, bi puntuak lortuta ere “Liga ez da Telden erabakiko, ezin dugu itsutu behar oso irteera zailak ditugulako ostean: Porriño, León edo Barakaldo eta etxean ere partida zailak”. Rocasaren inguruko Europako partaidetzaz, Arrojeriak onartu du “bidaiek nekea sortzen dute baina Challengen aritzeaz lehiatzeko beste puntu bat ematen dizu. Ez dut Rocasa nekatuta espero bihar”.

04 Apirila 2016

Larunbatean partida ofizial bakarra zegoan programatuta, eta bertan Bera Bera jubenil taldeak gol bakar batez irabazi zion Ereintzari Errenterian (25-26), Foru Aldundiko txapelketako aurreneko jardunaldian. Loterías Ligako Bera Bera eta Clínicas Rincón Málaga taldeen arteko partida aurretik, Bera Bera eta CD Bidasoako eskolen arteko topaketa bat burutu zen lehengo larunbatean Bidebietan. Datorren asteburuan, harrobiko taldeek lehiatzera itzuliko dira.

04 Apirila 2016

2015-16 denboraldiko Loterías ligak partida erabakiorra izango du asteazken honetan Teldeko Antonio Moreno kiroldegian, izan ere, aurrez aurre izango dira bertan Liga eskuratzeko aukerak dituzten bi taldeek. Bera Berak jokoan jarriko du Liga Telden, Rocasa liderrak baino bi puntu gutxiago ditu lehiaketa amaitzeko zazpi jardunaldi gelditzen direnean. Hortaz, Bera Berarentzat Kanarietako partida erabakiorra izango da berriro, aurreneko hiru denboraldietan bezala. Gipuzkoarrek Rocasa gainditu behar dute asteazken honetan (20,30etan Donostiako ordutegian), Espainiako Eskubaloi federazioko web orrialdean streaming bidez ikusgai izango den partidan. Donostiarrek daramaten bi puntuko desabantaila eta kanariarren garaipena Bidebitan (26-27) kontutan hartuta, garaipena hitza baino ez da entzuen Bera Beran. Berdiketa batek teorian gauzak diren bezala utziko luke baina praktikan Rocasak average delakoarekin hirugarren puntua lortuko luke. Porrota erabakiorra izango litzateke. Aintzindari positiboak Bera Berak jakin badaki Teldeko Antonio Morenon derrigorrez irabaztea. Liga eskuratu zuen aurreneko urtean, 2013ko urtarrilean, sailkapenean hirugarrena zen Bera Berak 20-26 irabazita Rocasa liderra bertatik kendu zuen Elche Mustang taldeak Alcobendasen galdu zuelarik. Donostiarrek lidergoari eutsi zioten denboraldia amaiatu arte eta aurreneko aldiz Ligako txapelketa eskuratu zuten. Hurrengo urtean, 2014ko otsailean, Bera Berak partida ez ezik (27-22) average delakoa ere galdu zuen Telden. Jardunaldi hori ostean, gipuzkoarrek puntu bakarreko tartea zuten Helvetia Alcobendasekiko eta bikoa Rocasarekin. Bera Beraren mesederako bi hauek berdindu zuten partida handik hiru asteetara, eta azken aurreko jardunaldian Bidebietan irabazi zuten Liga Imanol Álvarezen neskek. Eta iaz, 2015eko apirilean, bi puntuko aldearekin eta bost goleko poltsan agertu zen Bera Bera Telden, 24. Jardunaldian. Pucheren jokalariek ez zuten aukera galdu eta 21-24 irabazita matematikoki Antonio Morenon ospatu zuten Ligako txapelketa hirugarren aldiz. Rocasa – Bera Bera zenbakietan Aurtengo Loterías Ligan, kanariarren eta donostiarren arteko aldea Bidebietako partidan dago, Rocasak irabazi zuena. Bi taldeek amore eman dute A Guardan, hortaz, asteazkeneko norgehiagokak zeresan handia du Ligako etorkizunean. Iazko denboraldiarekin konparatuz, badago aldea Rocasaren datuetan. 19. Jardunaldian, kanariarrek iaz baino 39 gol gutxiago sartu dute ligan eta 29 gol gutxiago jaso. Bera Berak, berriz, ia berdinak ditu, bi gol gutxiago sartu ditu aurten eta bost gutxiago jaso. Gol bakar batez irabaziz gero, garrantzitsua da gol kopuru orokorra, non Bera Berak Rocasak baino 36 gol gehiago ditu. Izan ere, azken hiru norgehiagoketan gol bakar batek erabaki du lehia: Rocasak Castelloko Kopa bereganatu zuen (19-20) luzapenean; Bera Berak Superkopa lortu zuen Donostian 18-17 eta ligako joanekoan arestian aipaturiko 26-27 kanariarren aldekoa.

03 Apirila 2016

Ez da erraza lehiatzera itzultzera hiru asteko etenaldia pasatu ostean, halere, Bera Berak Clínicas Rincón Málaga (30-23) gainditu du defentsan ohiko intentsitatea mantendu duelako, Ana Tempranok partida hasieran oso geldiketa onak egin dituelako eta kontraerasoa baliatu dute donostiarrek markagailuan tartea irekitzeko.
Baliabide horiekin, Bera Bera 8-1 jarri da aurretik, Tempranoren bost geldiketa medio eta kontraerasoan Menéndez (2), Etxeberria eta Pinedok asmaturik. Halere, eraso posizionalean arazoak izan ditu taldeak, Ederrak asmatu du lehen baloian eta zazpi metroetatik ez da fin ibili, aurreneko zatian hirutan huts egin baitu.
Halere, Clínicas Rincón Málaga erasoan asmatzen hasi da Karsten, Stroe edo Lópezekin baina Bea Fernándezek lekukoa hartu du hiru golekin, atsedenaldian 13-8 aurretik gipuzkoarrak.
Bigarren zatian, Puchek 5-1 defentsa jarri du Alicia Fernández aurrean jarrita. Andaluziarrek tartea murriztu dute (18-13) baina Bera Berak estutu du berriro, penaltiak lortu dituzte, Maialen Múgicak gauzatu dituena (lautik, hiru). Zarauztarrak 15 hilabete igaro ditu pistatik kanpo. Bere bi golei esker eta Martínezen jokuak, bikain bigarren zatian, partida hautsi dute (41. min. 20-13).
Hortik amaierara, Puchek minutuak banatu ditu Ezkurdia, Lizarbe –gaur 20 urte- eta Zugarrondo sartuz, gaur ere oso geldiketa onak egin dituena.
Hortaz, hamaikagarren garaipena jarraian erreskadan Loterías Ligan eta hemendik asteazkenean Rocasaren aurkako lehia erabakiorra baino ez dago Bera Beraren baitan.
Fitxa: Bera Bera 30, Clínicas Rincón Málaga 23
Bera Bera 30 (13+17): Temprano, Etxeberria (2), Menéndez (3), Arrojeria (1), Ederra (1), Martínez (5) eta Pinedo (4) –titular- Sans (1), Alicia Fernández (4, 1p), Bea Fernández (4), Ezkurdia (2), Múgica (3p), Lizarbe eta Zugarrondo (o.a.). Deialdian: Yáñez eta Husillos.
Clínicas Rincón Málaga 23 (8+15): Solano, Stroe (1), Valdivia (3), Karsten (6), Torres (1) Mjaerum (2) eta López (1) –titular- Méndez (3), Moreno, Gutiérrez (4), Ramos (2), Cuevas, Virginia Fernández (o.a.).
Epaileak: Javier Álvarez –EAE- eta Yon Bustamante (Nafarroa)
Kanporatuak: Menéndez, Etxeberria, Martínez, Lizarbe eta Bea Fernández Bera Beratik eta Méndez (2), Moreno, Karsten eta Gutiérrez Clínicas Rincón Málagatik.
Partzialak: 1-1, 2-1, 5-1, 8-2, 9-5, 13-8 –atsedenaldia- 15-11, 18-13, 22-14, 23-16, 26-19 eta 30-23.